sinusuri sa papel na ito ang epekto sa kabuhayan at antas ng pamumuhay ng mamamayan ng siyudad ng Maynila
ng mga pangyayari sa panahon ng ikalawang yugto ng Rebolusyong Pilipino ng 1896 at Digmaang Pilipino-Amerikano. Nakasentro ang talakay sa pagsusuri sa epekto sa kabuhayan lalo na sa antas ng pamumuhay sa siyudad ng pag-aagawan sa kontrol na pampolitika sa siyudad ng Maynila ng mga puwersang Amerikano, Espanyol at Pilipino matapos ang Labanan sa Look ng Maynila noong Mayo 1, 1898 hanggang sa pagtatatag ng Pamahalaang Sibil noong Hulyo 4, 1901. Gamit ang mga datos na pangkabuhayan, patotoo, salaysay at iba pang primaryang sanggunian sa panahong sakop ng pag-aaral, kritikal na sinuri at tinalakay ang mga pagbabago sa ilang salik pangkabuhayan gaya ng daloy ng suplay ng kalakal at serbisyo, negosyo at industriya, trabaho, at presyo ng bilihin, at ang naging implikasyon nito sa antas ng pamumuhay ng siyudad ng Maynila at mamamayan nito ng mga kaganapan sa panahon ng Rebolusyong Pilipino ng 1896 at Digmaang Pilipino-Amerikano.
