Usapang Ina at Anak
ni Merlinda C. Bobis
“inang, napakaiksi ng inyong biyahe
mula kama hanggang kalan.”
“ay, anak, tinatawid ko sa mundo
ikaw at ang tatang.”
“inang, nanunuyo na ang inyong mga matang
hindi marahil nasipingan ng diwa.”
“anak, ako ang nagluluwal
ng binhi ng isip.”
“inang, araw-araw yata
ay umiikli ang inyong dila.”
“anak, anak, ang mga labi ko’y hitik
sa mga salitang napipi ng halik.”
“inang, hindi tadyang
ang hinugot kay adan—
puso.”
